關於部落格
I Can Spread My Wings Out Wide, Touch the Sky
  • 19127

    累積人氣

  • 4

    今日人氣

    1

    追蹤人氣

2012-7-27 (五) 第五堂課

今日因為雀鳥花園後面條界限街有意外,塞到阿媽都唔認得,搞到要兜大圈先去到延文禮士道同嘉林邊道練習。都好,「大鄉里出省」有機會去吓唔同嘅路睇吓,多得咁樣先至第一次經過城大最新嗰座新多媒體大樓,而且竟然到而家都未完工!加埋咁多設計缺憾,真係嘥錢。

 

兜咗個大圈又上山又落山咁,又去到一d幾千萬千幾呎嘅屋所在的路段,終於去到由書院道入去嘅另一個大圈,準備係新地方學新嘢。而家仲有少少雨落,應該都係颱風留低嗰d小雨區,上次水戰都無問題,今次毛毛雨算得乜?

 

師傅話有個「神人」係呢度練轉斜路彎玩足4日先收工,睇吓我手車會唔會又破佢呢個紀錄喎。點會咁易俾你睇死0架?!

 

原來天光道有一個同呢度一樣嘅彎,如果我唔係考忠義街,佢話一定要練到我好熟咁2波入到呢個彎加埋落斜先至會放我走。好在忠義街無呢類麻煩嘢,或者1波轉得好已經可以「落山」學另一樣。

 

轉去呢個新場度玩,令我超緊張,可以講得係錯漏百出。不斷轉波、拖波、轉波、拖波,又係條好似「神秘的迦密村街」嘅路度,順手學埋望鏡擰頭cut線新技術,搞到好鬼忙,做得一樣手腳又配合唔到做另一樣。又俾人串手腳協調有問題,真係吹到「啤」一聲!

 

嗰條街真係死車奇多,等泊位嘅「半生不死」車又多,對頭車壓埋自己線但自己又要cut出去再cut番入自己線又多,難度甚高。唔怪得要入嚟呢個深山修練啦!

 

Cut車嗰陣,唔係做唔切打燈、望鏡、擰頭、cut線,就係黐得左邊太多「接近物體」(ß肥佬項目);轉彎又太近壆,幾次都差d上咗左壆。到落斜,又要拖住迫力慢落,等架車慢慢溜落去再停低手制空波等轉燈,轉燈一開波已經要左急彎轉90度入番去內街,加埋再次轉2波俾油等等,一直練左彎同斜坡技術。

 

今堂都真係緊張都爆炸、手忙腳亂到七彩。

 

話咁快就過咗緊要刺激又難搞的個半鐘,真係要好好反省點樣可以做好d技術先得!暫時諗到除咗上網睇論壇教學同YouTube,仲要多多觀察其他司機點揸車當做借鏡,同埋做多d mental driving──無架車係手,最少都係個腦度溫習吓都好過無。

 

今堂問題:兩腳配合唔到,回軚太遲、極力子使用不足、行車左右擺,特別係成日「飄」咗去右邊,搞到差dß第一次俾師傅拍窗話

 

 

相簿設定
標籤設定
相簿狀態