關於部落格
I Can Spread My Wings Out Wide, Touch the Sky
  • 19126

    累積人氣

  • 3

    今日人氣

    1

    追蹤人氣

2012-7-30 (一) 第六堂課

再次做返上一堂學過嘅嘢,好在距離上一堂唔係太耐,總算有返d記憶。

 

仲係要轉得好個尖彎,所以今日嘅目標就係可以係做完轉上3波行車兼避死車之後,要成功切返入左行車線拖落2波,再用2波轉好個落斜彎。

 

咦,乜今日咁多工程車同半生不死車係條路度?仲要係短短幾百米嘅直路同上斜短路度有人揸住「停」、「去」牌控制交通,似乎今日會不停咁轉波拖波,停車開車,肯定有排搞。不過呢,師傅話而家忠義街開工整地鐵,到時都有可能會係有好多地盤車、「停」「去」牌係度篤住晒,所以今日練定係件好事。同意!

 

今日轉波無咁騰雞,但係一拖波就係咁chok,俾人話踩迫力太用力,每次去到路口就一係停得太急,一係就變咗空波滑行或者停得太早,變咗睇唔到來自右邊d車究竟會直行定係轉入嚟。

 

原來條街係會有巴士轉入嚟嘅。當巴士轉入嚟嗰陣,雖然巴士司機見到我個「學」字牌都會得慢d入彎,可能費事嚇親搞到我亂踩,將油門當迫力 (啋!)掛。每次去到路口見到巴士轉過嚟,都仲係覺得好有壓迫感。

 

師傅見我吊極力子吊到咁唔掂,就係上斜嗰度叫我停咗架車,係度練點樣吊極力子呢個棍渡車靈魂。

 

條街有34架死車泊咗左邊,前面就係「停」「去」牌。我哋先係其中一架車旁邊停低,先學點樣做斜路開車。

 

嘿嘿嘿好在事先睇咗網上講斜路開車段片。雖然段片係教棍波私家車點做,但係應該同棍VAN相差唔大掛。因為自知揸車天資不足,所以每日都一定去睇討論區,睇吓人地係點樣學車、遇到咩問題同解決方法。

 

要做斜路開車,方法其實同平路開車無乜大分別,一樣都係要吊極力子吊到架車開始震,有少少想向前行咁,之後再放手制同俾少少油令架車可以順利起步唔會溜後。全靠有做預習,先至可以頭威頭勢做好呢樣嘢咋!

 

好嘞,KO斜路開車之後就輪到吊極力子。

 

極力子真係一樣好得意嘅嘢。完全唔踩係嗰陣,個離合器條軸就會同個引擎條軸黐埋一齊,將所有動力都傳去俾架車用;完全踩到落底嗰陣,離合器條軸就會同引擎分開,唔會傳送動力去引擎郁車;踩一半唔踩一半,即係吊極力子啦,就係個極力子開始接觸到引擎條軸嘅時候,亦即係架車開始「震」、有動力可以開車嘅時候。

 

係上斜嗰陣,唔鬆解極力子令架車震,架車就變咗無動車,於是只要放開手制,架車就會溜後。(WELL,上斜溜後係路試必肥項目。) 所以,係斜路開車一定要鬆夠極力子先好放手制。落斜就相反,因為踩住極力子反而令架車無動力,再加埋唔落迫力,架車就會向前衝到咁碌落去,所以師傅一直都提住我,叫我落斜要印住個迫力先好落去,如果唔係架車死衝爛衝就好大鑊!

落斜做埋吊極力子的話,架車就會有一種牽引力阻止佢向前衝同加速,所以踩極力子落斜,架車反而會慢咗添。係落斜起步,除咗要鬆極力子之外,記住記住記住要印住個迫力先放手制,如果唔係,分分鐘真係入咗波一起步就會衝前撞到前車。到時就真係大檸樂!

 

按指示,我要吊住個極力子,仲要只係靠極力子去控制架車慢慢行同停低。第一項挑戰係齋用極力子將架車停定係而家個位度。好,等我鬆到架車震再入一波放手制先。咦?架車溜後咩?再鬆多少少。架車開始爬上去喎,又要放輕少少。

經過幾次試驗,終於成功令架車定住係度。下一步就係要令架車龜速爬上去,分別停係旁邊唔同嘅車側邊。我慢慢放極力子,令架車真係比起以前做慢車更慢咁向前行,但係一起到目標旁邊又好似腳抽筋咁大腳踩落去,架車即刻溜後!嚇到我叫出嚟!好在晏晝時分呢
d豪宅區唔會有太多車流,後面亦都無的士衝上嚟。於是即刻鬆極力子,寧願架車先向前爬再慢慢跣落個目標位度。

 

咁嘅表現,師傅梗係唔多滿意啦,直頭出聲話「你個極力子吊得好差」,仲俾人話踩極力子好似踩衣車咁,係咁踩但又踩唔0

中.晒.箭!

 

時光飛逝,經過多幾次練習已經叫做可以收貨,繼續兜圈學上落斜同轉彎。但係又俾師傅發現另一項問題:軚盤控制不當,擰軚似搾牛奶多過扭軚。

 

其實早係第二堂嗰陣,已經用模擬軚盤學過點樣推拉軚,只係而家被發現手部動作唔夠大,成日都只係窄幅度郁軚,搞到即使係咁擰軚架車都轉得唔多,回軚又會唔夠有時又over咗。

 

再加埋係九龍仔公園出面再有一埋死車、等泊位嘅半生不死車,要顧住望鏡擰頭打燈cut線,仲要小心唔好接近物體,真係忙到死!

 

幾時先至可以離開呢個深山去修練其他嘢呀?

 

 

係三十幾度之下忙完個半鐘,真係好似度日如年咁,加埋自己緊張,成個背脊都濕晒……


 

 

可幸,學咗6堂師傅終於覺得我可以舞得掂架車少少,就俾我試吓揸返去旺角。

 

~~~第一次皇恩浩蕩御批大長征呀!真係要小心d慢慢揸,聽清楚指示千祈唔可以有任何閃失!面子同安全都好重要呀!

 

過完死車條街,就係街口等住過左線cut入去返九龍塘條線度。唔知點解停車之後有勁多車係眼前飊過,有的士、貨車、泥頭車,等咗幾分鐘先至清晒條路可以慢慢轉出去。 「回軚呀!回快d!喂,行番去中間得唔得?」係係係

 

條路慢慢落斜加埋少少大彎,去到一個燈位被指示「行中線,跟前面架車直行」。OK。但一開車又好似HANG機咁,唔知想架車去邊度,飄咗向左都唔止,仲要無轉到暗彎cut返入去條線度

 

咦?呢度咪係學轉波嗰陣九龍塘條街?哈!原來咁樣直行就係返九龍塘。「嗱,今次返嚟你已經升咗呢,係咪好易行?」「係喎,好耐無係九龍塘啦!I MISS HERE!」咪開心住,直接經過九龍塘出油站之後,就要轉入界限街準備跟番以前師傅車我返旺角條線返太子警署。

 

由於本人技術甚為嚴重不足,所以係油站度等到無晒車師傅先至叫我入一波出去轉左入右線直行。係一條單程路度再次右轉,等於做咗個大U-TURN轉方向返旺角。

 

今次係燈口轉右再入cut去大路直行就可以返旺角。但係呢,呢條唔知叫乜嘅路(好似係窩打老道再轉入太子道西)d車多到根本係我應付唔嚟嘅,大中小車、貨車、田螺車,都唔知點先可以cut到要行條線!師傅話「唔駛驚,我會幫你cut出去。俾d油行出去先」我真係未見過咁多車係自己身邊嘭嘭聲咁過!以往都係做乘客,d車點過都唔係好關自己事,今次開始終於體驗到係香港開車係幾咁難、幾危險!好在有師傅係旁邊幫住,如果唔係都唔知幾時先cut到出去。

 

無驚無險出去自己條行車線,又要停一停再cutcut入另一條線,跟住又俾師傅話我太慢,要我轉3波行。大佬呀!俾少少空間人地適應得嗎?話晒第一次見呢種「大場面」咋。行到40幾公里先至似樣,但又飄左面好多次,真係搞咗好耐先至返到去警署外面,仲差d忘記係個路口度轉返入去警署。

 


 

相簿設定
標籤設定
相簿狀態