關於部落格
I Can Spread My Wings Out Wide, Touch the Sky
  • 17464

    累積人氣

  • 5

    今日人氣

    1

    追蹤人氣

2012-8-9 (四) 忠義街視察行

其實同學車都不無關係。事關今晚約咗要上忠義街視察,而且要係7點半之前去到愛民商場出面等齊人,跟車睇吓兩條線點樣行。雖然自從知道考忠義街之後,一路都有上YouTube睇晒大細圈d路點行,但係始終未真正係忠義街行過,唔知道路況係點。

 

1925先至係愛民商場對出落小巴,即刻睇到無車就做一次「盲毛」,衝過對面望吓學校架BENZ到咗未。

 

學車之後,因為了解咗作為一個駕駛者嘅責任同諗嘢方式,所以都特別討厭d無遵守法例嘅盲毛。正因如此,自己都唔想做盲毛,變得更加小心同遵守交通規則。

 

上咗車同負責今日帶視察同講解嘅師傅(唔係平日教開我嘅師傅)打過招呼之後,係咁易咁八吓忠義街條線係點,再一路等埋其他學神上車。

 

到咗7點半都未見有其他學神到場,師傅決定只係載住我同另一個學神先行出發。

 

首先沿住愛民商場直上轉左,去咗考試中心度睇睇。今日有好多學車係忠義街度練泊位調頭同操路線,師傅話可能聽日星期五有好多人要考呢度,所以有一堆學車係度。

 

考輕型貨VAN的話,考完丙部路線之後返忠義街考試中心先會做斜路開車、泊位同調頭。貨VAN有可能會泊2號位或者4號位,之後再行上少少去到近迴旋處之前做窄路調頭,完成之後再開車,駛過咗停車指示時間牌之後,停車熄匙,再入番後波就完成考試。由於忠義街係條向上斜路,斜路頂就係考試中心,所以完成調頭之後,車頭係向住斜坡底,所以要入番後波。

 

由考試中心出發,先行咗個細圈,即係經「神秘嘅迦密村街」嗰條線先。都話咗超多學神在場,轉出孝民街之後落山條路,完全被學神塞住晒,塞咗成5分鐘先至落到山準備忠孝街。

 

迦密村街點解神秘?全因為呢條唔過300嘅街無論幾時都禁止學車入去,公眾假期都唔俾,一係就師傅同學生各放底$600違例罰款入去。就因為咁,變咗無時間練習,再加上經常有大量死車係度,要不時停車開車慢車停車開車cut線咁,車況又多變,前一分鐘同下一分鐘條街已經變化唔少,之前都聞說有唔少人考細圈都會死係度。因此,學神好多時都係座係車度,由師傅揸入條街度睇吓,再由師傅講解完之後,就係考試嗰時先至會可能被考官派入條街度「送死」。呢條街真係可以講得上係「屍橫遍野」

 

言歸正傳。行完迦密村街之後,師傅先至收到一個遲到女自動波私家車學神電話,話到咗愛民商場。無計,唯有再折返愛民商場接埋佢先再行埋另一條線。

 

接完人之後,又再兜返上忠義街,但今次呢哇噻!仲誇張!d學車直情塞死咗忠義街同孝民街右線!我地架車係山頂一路塞足兩個字(10分鐘)先至去到孝民街轉忠孝街街口!

 

真係無計,唔可以再兜迦密村街俾遲到嗰個睇,改為直接行佛光街線(大圈)

 

心諗:好在無遲到可以入一入迦密村街咋!

 

大圈真係好行好多,頂多都係斜路上上落落同右線轉入去啫,比起細圈(迦密村街線)易得多,無咩要講。

 

 

 

兜完兩條線其實都不過2015,求師傅兜我返愛民商場先落車,再轉小巴離開何文田完成今次視察行。

 

下一次上嚟忠義街,應該要等我學多d技術,等本人嘅師傅認為我得,先會帶我上嚟操練。到時唔知距離考試仲有幾耐呢?

 

 

相簿設定
標籤設定
相簿狀態