關於部落格
I Can Spread My Wings Out Wide, Touch the Sky
  • 18453

    累積人氣

  • 0

    今日人氣

    1

    追蹤人氣

2012-8-13 (一) 第九堂課

上一堂學完調頭都未夠爐火純青,今堂因為師傅去完九龍塘話勁多學車,所以唔去九龍塘練習,所以要轉地頭去咗澤安考試中心嗰度練。

 

由旺角出發經過界限街同九龍塘訓練場,左轉入去好似係石峽尾邨定係南山邨入面,再行出d已經見到又一城同左面嘅城大研究生宿舍。再左轉上山就見到澤安邨,cut右線等對面行車線無車就轉入去澤安考試中心。

 

今日係星期一,只係開星期二同星期四嘅澤安考試中心無人,亦都無乜學車,地盤車都少,所以可以好放心咁慢慢練。

 

澤安考試中心同忠義街有少少似,兩個中心係出面都條向上斜坡嘅路頂,所以可以係度練好3手調頭,要係忠義街做番出嚟理應唔會有太大問題。只係忠義街有工程做緊,右邊會有水碼,所以條路比平時仲會再窄d

 

今日仲係記唔到所有調頭步驟,要師傅不時反問式提點,有時又會架車去得太快(如果係忠義街已經會撞壆/ 水碼,即肥),有時會忘記做下一步前要打燈望鏡拎頭。

 

每做完一次就要落斜,去到出大路就要大手扭右軚U-Turn盡架車轉番上斜路再試過。因為條路好大又無車,每次做U-Turn之前只要睇到無車入嚟,已經可以做到U-Turn,唔駛刻意再係路口度做多次調頭。

 

做咗調頭個半鐘,已經可以自己一路做一路講點樣做3手調頭嘅步驟,同掌握到點樣係斜路調頭之餘仲有位淨可以較正架車入線添!

 

真係要多謝師傅嘅教導!

 

落堂由澤安道出發,經大埔道落番去深水埗同旺角。

 

出到去個燈口入天橋,我問「咦?呢度唔係澤安條考線咩?」

 

「哈!你又知?」

 

「嘿嘿,有睇YouTube 0架嘛,仲唔只淨係睇忠義街添!」

 

一路落山,下意識咁記得澤安呢條考線點行,一去到油站就收少少油同望吓左邊,望吓有無車係油站出嚟。

 

去到大埔道,好多車。師傅叫我俾心機「行返自己條線」,同提我幾時要轉波同拖波。無幾耐已經去到路口要轉入去返旺角。

 

行去d後街有好多死車,要慢慢係中間穿過,又見不時有車打開車門同有盲毛由行人路閃出嚟。哎呀~~~ 咁就衰接近物體嘞!不過而家又唔係考緊試,首先要安全穿過條街先至算。

 

成功返到終點!學完做到3手調頭,真係幾有成功感!總算又一次可以帶住笑容落堂。

相簿設定
標籤設定
相簿狀態