關於部落格
I Can Spread My Wings Out Wide, Touch the Sky
  • 19126

    累積人氣

  • 3

    今日人氣

    1

    追蹤人氣

2012-8-14 (二) 第十堂課

今日真係唔知點解又超級緊張,搞到好多嘢都出錯。

 

走咗去一條叫丹桂路嘅小路度學點樣泊S位,真係估唔到S位難得咁緊要。

 

點解S位咁難搞!就算睇晒LED燈都掌握唔到,失敗! 較正個位再泊更難!

 

S位,根據師傅嘅教導,第一步係要將架車揸去同前車平衡,兩者左右相距大約16-20(咁上下),之後慢車入後波向後退,直至係左鏡見到泥擋去到目標線平排,即刻大手扭向路壆嘅方向直到扭盡為止。如果一切順利,個泥擋應該會以45度角切入個車位後方嘅角落。

 

呢個時候就要轉望右鏡,見到綠燈掂到車位白線就要即係向路中心方向回軚兩個圈,令前軚變直番,再一路大手扭向路中心方向一路郁車,直至軚被扭盡為止。

 

然後就要「用完即棄」右鏡,改為望中鏡,睇住架車慢慢向後行,直到個車尾遮住考試泊位場地內一個寫住「LGV」嘅黃格一半左右就OK。師傅話,即使泊完位個轆一d都唔直,只要車身所有部份都無穿出車位,車尾無出黃格已經無問題。

 

但我偏偏咁簡單都做唔好!每次扭軚都趕唔切係做下一個動作前扭盡,搞到角度唔準,入唔晒架車;再唔係就係慢車唔夠慢,架車去到太快,唔夠時間俾架車係扭完軚之後做反應真失敗。越做越無心機,越練越差

 

每做完一次泊S位都要練習慢車返出行車線。丹桂路原本好靜,但每次扭出去,或者開始倒車,都總係有一堆小巴呀、私家車呀、學車,係咁係後面剷上嚟,郁一郁又要踩迫力停一停。

 

好嘞,出到行車線又輪到要較正架車同路壆平衡先可以再練S位。扭出去之後,要留意車頭唔好掂到雪糕筒,車尾泥擋亦都唔可以掂到任何嘢。當車頭過咗雪糕筒就要回軚。

 

我真係天生對直線有障礙,整嚟整去架車都唔直,就好似平日係條街度都唔可以係自己行緊條線keep到直行一樣,難怪師傅都會火滾想鬧。我知衰但我真係有盡力去做。頹到爆炸……

 

 

頹住咁練完個半鐘,真係乜心機都無晒。一路揸返旺角都唔係好想出聲講嘢,一來無心機,二來怕再唔專心真係會炒車,到時師傅就唔係鬧咁簡單

 

決定咗下星期再練S泊位,之後師傅話要將我「的」上忠義街練路線。

 

因為一早知道自己手車唔得(成日俾人提住呢樣嗰樣都做得唔好。雖然師傅提點係好事,但堂堂都提住嗰幾樣,就證明真係揸得有問題啦),所以預先問定補鐘嘅事,以備我「必要」之需。

相簿設定
標籤設定
相簿狀態