關於部落格
I Can Spread My Wings Out Wide, Touch the Sky
  • 18453

    累積人氣

  • 0

    今日人氣

    1

    追蹤人氣

2012-8-24 (五) 第十三堂課

今次係我第一次係師傅指導下,自己揸上去忠義街。條線會經過公主道,而且嗰度有好多大車、巴士、的士經過。第一次上呢條「半公路」,真係難免有d緊張,要師傅一路提點住慢慢3波左右擺咁行上去。

 

每次開車鬆極力子都好chok,停車又chok,卒之師傅都頂唔住出聲話:

 

「喂,唔好次次開車都一次過放咁多極力子喇,搞到架車起步就chok。鬆極力子鬆到架車震已經ok,咪咁快放晒極力子。」

 

「唔該你唔好咁粗魯,次次停車都咁大腳踩落個迫力度得唔得。你咁chok法,chok多幾次考試就肥喇!輕力d,慢慢踩落去dup停架車仲有呀,停定車先至好落手掣,如果唔係就變咗空波滑行──又輸!」

 

「好心你喇,咪次次都一腳踩落油門度好唔好?油門唔係要嚟踩0架!輕輕力掂就得0架嘞!咪咁粗魯得唔得?輕力d。」

 

「唔好跟親前車就係咁大腳俾油得唔得?做乜跟住人地行咁快?keep住行番自己個速度,唔好見車就跟住飊。喂喂喂望鏡呀!見唔見到有鬼(搵食車)竄緊上嚟呀?放油門喇放油門俾佢過先呀!咪咁心急俾油,唔好諗住過佢頭嘞。」

 

「我都唔明,點解你次次拖波都趕住俾油?好趕咩?搞到架車行得唔順。等架車拖完波先再俾油都未遲啦。記住,拖波架車係會慢咗嘅,咁心急俾油為乜?」

 

吓?乜我仲有咁多壞習慣咩?我淨係知自己開車停車都chok,但就一直都唔知原因咋喎油門同極力子控制呢,我認,我認,我認衰而家認衰,總好過考試肥咗睇住黃紙d剔,都唔知自己死d乜。

 

 

第一次真正去到忠義街考場度,直接試做泊位調頭。

 

今日真係what can go wrong totally goes wrong…做乜嘢都出問題……

 

 

終於排到考試的4號泊位做泊S位,突然失憶唔記得晒要點做,要師傅逐步逐步再提示;做完失敗嘅S位,再爬上d係斜路做3手調頭,又再失憶!真係忍唔住即刻爆粗鬧自己兼無晒信心……又要人地一路提一路做……

 

完咗之後,帶住頹廢心情繼續操路線。

 

或者做唔到泊位調頭真係有影響,就算係操路線都做得唔好。不但架車成日偏右,拖波時踩迫力太大力令架車chok,車未停定又靠手制煞車,回軚又唔夠快,入彎角度唔夠靚入唔到預定行車線。

 

師傅見到我用2波行孝民街落山,直到過咗咋電單車車位都未轉3波,於是出聲話「2波咗好耐喇喎」提到出晒面,點敢唔轉3波呢?如果唔係考試度係適當路況轉3波行車,肯定又俾考牌官剔我「未能使用適當波段行車」。

 

由孝民街落斜時,明明係推咗去3波,架車好似落斜越轆越快,師傅瞄一瞄個波箱,話「你好似入咗5波」「係咩?」望一望,咦?點會咁0架?真係5波喎!真係嚇一跳,即刻落迫力拖慢架車,再拖返落3波慢慢碌落山。去到小巴站提示位又忘記拖波去2波。去到孝民街路口再開車,又唔知點解咁低能忘記要入波開車……

 

因為愛民村有好多巴士、小巴、的士,又多盲毛不時衝出嚟亂過馬路,所以師傅話要多d望鏡留意交通情況,又要望側鏡睇睇有無搵食車會突然從後面cut出嚟爬頭,遇有此情況就要放油門令架車慢,寧願俾d「鬼」過咗先,自己再俾番油加速。自己cut線又要小心,唔好齋掛住望盲點,就不經意令盤軚轉咗,要完成望鏡拎頭後,當自己個頭望番前面先扭軚,就可以糾正呢個情況。

 

大圈已經操多好多次,所以就操細圈。細圈除咗無得入迦密村街之外,一定要熟點樣行孝民街落山之後轉左,經過巴士站同愛民商場再轉左上山返考試中心嗰一段路。

 

行完大細圈幾次之後,就要行培正道一帶落山返旺角。

 

點知去到培正道考線,準備入右彎,就因為自己回軚太遲,差d同左面線另一架一齊入彎嘅學車撞,仲入錯埋行車線,要師傅出手相救十萬個瘀!!!話晒都揸咗26(13),都可以揸到一pat屎咁,唔通真係要延期考試同補夠40課?

 

今日真係夠晒瘀……係忠義街出晒醜丟架丟到何文田。

 

相簿設定
標籤設定
相簿狀態