關於部落格
I Can Spread My Wings Out Wide, Touch the Sky
  • 19126

    累積人氣

  • 3

    今日人氣

    1

    追蹤人氣

2012-9-7 (五) 第十七堂課

每次上2045嘅堂,除咗頭一次傻傻地係旺角遊蕩之外,每一次我都係留係又一城度過殺時間嘅。我真係好想同師傅講,不如我係九龍塘上車啦,反正每次我人在九龍塘,都係到8點半先至再搭地鐵落太子。師傅話唔work喎。

 

今次又路經九龍塘,但係無乜學車係度。好奇咁問,師傅話可能大家都升晒呢去試場度操,得番我一個係度唔知練d乜!莫非連蛇行學神仔都升呢到去試場了?「唔奇呀」

 

師傅指示我去衡州道練習我最弱嘅泊位。

 

條街好靜,d街燈仲係10點鐘左右熄埋,而且用嚟練習嘅咪表位前後都有靚車,一個唔覺意撞親人地架車,真係唔知要不吃不喝幾耐先夠賠!咁0岩要練嘅街位前後都係靚車:前面係掛P牌嘅PORSCHE,後面係架AUDI7人車。哇好有壓力喎。

 

師傅發現我每次都泊唔成位,主要係因為我唔識較好架車同鄰車夠埋、唔夠直、扭軚唔夠快所致,所以今次主力再教我點樣較好架車同旁邊平衡。

 

哎呀,點解每次用親極力子同迫力做慢車都會「吱吱」聲?原來係我踩迫力太深,只要唔好太用力踩迫力,改為踩極力子多d,直接控制架車嘅動力多少就可以解決。

 

做咗好多次較正架車,都唔係做得好。師傅又拎車仔出嚟教書,耐心解釋要望鏡同石壆嚟較好架車同左邊嘅車平衡。較正架車要望左鏡同前面,扭軚要逐少逐少扭,等架車俾反應先,然後覺得唔夠直先再作出扭軚修正,唔好一下子扭咁大軚,否則架車會又再偏另一面,變咗S型咁行,永遠都唔夠直。當架車夠直,就要keep住軚直,唔好俾架車繼續飄向一邊。

 

我呢個「直線障礙重症患者」,真係成日都攞唔到直線。架車係馬路上面行,都有偈油跡同軚痕可以跟吓,去到泊位真係好靠經驗同直線感覺,對我嚟講好慘……好在,忠義街考場d泊位地而咁0岩有兩條黑線幫到我。

 

師傅又教,假如架車同左邊嘅車距離太開,個泥擋要係未到白線之前已經要扭向石壆一邊;如果都係太開,就先回d d軚,等架車再後退多少少先至再扭盡。

假如架車同左邊嘅車距離太埋,就相反咁要等泥擋過咗白線先好扭軚向石壆一邊。而且,架車要一邊行一邊扭軚,要避免扭死軚。佢話,只要架車車尾入咗LGV黃格,同埋前轆最突出嘅部份,無超出白線格之外已經收貨。

 

成堂大部份時間都好轉注係較線同泊位度,落堂之後我都唔知自己算唔算掌握咗呢樣嘢硬係覺得次次較線同泊位都有d符碌成份。係我自己太無信心?

 

又講起1號晚同舊同事食飯,講起舊老細學車嘅事。當晚我問老細佢考車考邊條線,佢答係沙田,我知佢係沙駕學生,而且佢仲只係學自動波私家車。我問:「老細,點解唔學棍波?型好多喎!」「學嚟做乜?」當老細知道我係學棍VAN,即刻「碌」大對眼望住我,跟住問:「咁你有無望過出街同其他車呀、巴士呀咁一齊行?」「吓?我地堂堂都出街同其他車爭路行喎,乜你唔係咩?」

 

相簿設定
標籤設定
相簿狀態