關於部落格
I Can Spread My Wings Out Wide, Touch the Sky
  • 19126

    累積人氣

  • 3

    今日人氣

    1

    追蹤人氣

2012-9-9 (日) 第十八堂課

哈,又估唔到今日都算幾好天,有d陽光咁,忠義街度都唔算有太多人同車阻住。日頭同夜晚上忠義街練習,真係完全係兩回事。日頭行孝民街落山,準備轉出去忠孝街,係有超級多小巴、巴士、私家車出沒,等咗好耐,見到忠孝街左線架小巴仲係度落客,有少少空檔都拿拿臨一波鬆一段放手制俾油轉出去先算,再等落去都唔知要幾時先出得。呢一刻我都覺得自己終於有番少少駕駛者嘅「心急」同機會主義。

 

前幾次夜晚上忠義街,試過好大膽咁、「好正確」咁行係條路中間,左右兩邊都無位無機會俾後車過我頭。師傅原本叫我讓一讓,但我話「佢地成日蝦我呢d學神,今次仲唔阻Q住番你!無得傾!我會繼續頂住佢,上到公主道就隨便佢點爬過我都得。」

 

行到去佛光街,又有一堆搵食車係度虎視眈眈想爬得頭。

 

今次,就要聽話讓開俾搵食車過,因為呢次上嚟係帶住準備考牌、萬事小心唔會俾考牌官剔到有事嘅心態,所以一聽到師傅話「睇吓鏡後面有無『鬼』」,都會醒定d,見到有「鬼」就縮油門算數。

 

一縮油門,唔係嘛幾部紅色小巴、兩部巴士係咁衝上嚟好急咩?

 

操完幾次大圈,再返上忠義街見到無乜車排隊練泊位調頭,就排隊上去做。經過7號晚嘅特訓,今次上斜鬆極力子無再溜後,再車都唔再chok死人。

 

師傅播今朝佢上忠義街見到嘅一個違例司機嘅片俾我睇。片裏面,我地架車係沿孝民街落山,去到山腳等轉出去嗰陣,突然有架7人車逆方向由忠孝街轉上孝民街!頂佢呀!呢條路明明單方向落斜,佢咁轉上嚟究竟個司機係咪盲0架?!

 

今日係試場度試泊晒2號同4號位,都好似無咩大問題咁喎。只係要小心較線,記住記住車慢軚快扭軚幅度大,如果泊位時泥擋未能以45度切入corner位,回少少軚,等架車再後退多d先至再扭晒入去。記住!要一路郁車一路扭軚,千祈唔好扭死軚!

 

其他要點仲包括:小心死車同鬼車爬頭,入彎回軚小心唔好踩到黃線同黃格、爬死車要慢而且唔好接近物體。

 

 

原本近6點師傅已經叫我落山,但我求佢俾我泊多次位,因為我真係好驚泊位呢樣嘢。佢見我聽日要考,都好好人咁御准咗。可惜,再兜上忠義街嗰時,實在有太多學車排隊,唯有完成咗呢個半細圈就落山返旺角。

 

今日行過培正道個「死亡彎」,係提示同少少幫軚之下過到關,以為一路平安無事返旺角,就係臨轉入警署之前,有個推住大車紙皮嘅阿婆,結果明明係3波行車都要拖到好似轉2波咁慢,仲要係旁邊有大量行得勁快嘅車旁邊扭左少少避開,之後又再cut返埋右面d準備轉入去。當然,都係靠師傅幫忙扭軚先至咁順利啦。

 

停好車,下一個學神已經係度等緊。Sorry,我聽日要考,阻咗佢少少時間都無辦法。

 

相簿設定
標籤設定
相簿狀態