關於部落格
I Can Spread My Wings Out Wide, Touch the Sky
  • 19126

    累積人氣

  • 3

    今日人氣

    1

    追蹤人氣

2012-9-10 (一) 決戰忠義街!@忠義街考試中心

 師傅同我去大圈度睇一次, 大致由考試中心去到佛光街都正常,佢仲話有預感覺得我會考大圈。講完都唔夠2分鐘,兜入忠孝街先知出事:星期一至五地盤開工,條街度勁多吊雞車同工程車係度「半生不死」,後面又有「鬼」,地盤前面幾乎每個出入口都有「停」「去」牌係度指揮交通。如果今日要考呢度,我就真係笑唔出仲話有預感我會考呢條線
 
輪到細圈。其實我最怕係迦密村街,叫我行今日嘅佛光街我反而真係唔多怕,或者真係一路以來聽得太多有關迦密村街嘅負面嘢啦。
 
咦?迦密村街今日一反常態,死車竟然異常地少,路面好鬼暢通,同過往幾次見到嘅完全相反!點解會咁0架?簡直係難以置信!
 
眼見機不可失,怕遲d車況有變,師傅係兜完我視察之後,就「的」我上忠義街考試中心度,叫我拿拿聲入去報名考試。
 
大佬,人地張路票考1205喎?唔駛咁快推我去送死掛?
 
呢個時候心情緊張到極點,師傅一味問我仲有無問題,同埋提我見到阿Sir要點做,有咩唔明就開聲問阿Sir,我就一味係架車度叫「好驚呀!點算呀!我真係好驚呀~~~
 
入到去考試中心遞路票入去,個當值女主任話而家無考生考緊試,可以安排我即刻考,叫我拎一對「駕駛考試」牌出去俾師傅裝上去架車度。
 
Gosh…呢一刻終於要嚟
 
拎咗對牌俾師傅掛起,就上去架車度放低文件,較好櫈鏡波,熄電話放好太陽眼鏡,等考官上車。
 
師傅做好晒d嘢,上番車係後座問我「點呀?仲有咩問題?放鬆d」「好驚呀好驚呀好驚呀~~~點算」我淨係識咁答成個人傻咗,個頭仲撞落軚盤度不知所措驚到呢
 
考牌官幾時係考試中心走出嚟,我根本無係中鏡到見到,反而係師傅見到就落車,扔低我一個去「送死」。
 
考官上車,禮貌上打招呼,俾晒d文件考官睇之後,係開考之前就要做視力測試,因為我報考嗰陣係報需要戴眼鏡嘅,所以要讀車牌測試。
 
係個考官上車嗰陣,特登係佢面前chok吓安全帶、較下塊中鏡,望吓左右鏡、摸吓支波棍,做齊檢查「櫈、鏡、波」動作,唔好俾個官有機會剔我「開車前準備不足」。
 
講番視力測試。呢個視力測試,真係「雞」度呢,話就話要讀一個距離架車23嘅車牌,但考場裏面邊度有咁多位呀?嗰dset咗係行人路度,斷估個距離都係十幾米左右。
 
0岩另一架學車擋住咗考試中心set好嘅車牌前面,所以考官索性叫我讀嗰架車個車牌當做視力測試。
 
「請你講出泊係嗰邊架學車嘅車牌。」
 
XX 0000」其實呢架車成日都見到,真係點都會記得個牌係乜。
 
「無錯。你預備好,我地可以隨時開始考試。你準備好未?」
 
「預備好啦,sir。」
 
「好,咁我地開始考試。請你開車,去到路口轉右。」
 
「知道。」
 
 
就係咁樣,路試正式開始──決戰忠義街!

 
 
講起都奇怪,明明考官上車之前仲驚到亂叫,個官上車之後個心即刻定晒,簡直可以用心如止水去形容。
 


落斜嘅時候因為有工人係架車前面,所以就算轉咗2波都唔敢俾油落去。去到路口,見到無車由左邊衝上嚟,即刻右轉入孝民街度。孝民街右邊係街泊位,例牌有好多車,左邊亦都有少少死車係度。係呢個開始落山位,我顧得轉去3波落山嚟,又顧唔住架車往右飄
 
「同學,小心架車偏埋一邊啦」
 
「知道,唔該阿Sir


 
呢個時候,我見到考官隻黃金右腳已經伸埋咗去個迫力度,我唔知佢有無踩,但係佢一出聲,我已經將個軚輕輕扭番向左邊。心諗「唔係一出師已經俾人剔『考官採取行動』,就咁肥咗掛?」但係呢一刻既然已經出咗車,個心就係掛住要完成個路試,平平安安返到考試中心。
 
一路轆落山,去到轉入忠孝街個街口,呢個鐘數無乜車阻住我,好快已經可以轉出去。可能轉嘅時候做得唔好,入線唔靚,可能就係呢個時候俾考官剔咗「轉彎位置不正確」,加送「軚盤控制不當」一個。


 
無驚無險咁,轉3波沿忠孝街繼續向前行,爬車我自問擰頭擰到頭都甩,cut出去都小小心心咁,先望晒左中右d鏡打燈擰頭先至慢慢cut出去。去到過咗牧愛街,就拖2波入右線,盤算唔知考官會叫我右轉迦密村街,定係直行去大圈。
 
呢一刻真係有生死決戰嘅感覺。


 
「請你係前面街口轉右。」
 
「知道」
 
即係入迦密村街啦。求吓你,呢一刻嘅迦密村街唔好出現瞬息萬變嘅死車陣,希望同正話跟師傅視察嗰陣唔好差太遠就得,俾我平安咁出返嚟就得0架嘞
 
轉入迦密村街,情況同剛才視察差不多,只係多咗少少死車,相信以我今時今日嘅功力,都足以應付嘅。如果連區區幾架死車都處理唔到,真係浪費晒師傅嘅心機同去靠背壟道嘅特訓。
 
行到去迦密村街盡頭,出面就係孝民街嘅小巴站,對正路口仲一定有架紅色小巴頂住,所以師傅教我,亦都示範過,係呢度出車,架車係可以踩住停止白線隻角咁出,否則就會太接近小巴同有機會炒埋去。今次我揸車考牌都係照師傅嘅教導,車頭遮住地面個白色三角形一半,見無車就踩少少角位出右線,去到斑馬線都唔見有行人係度,就俾多少少油用2波落埋去。
 
考官又指示「請你係路口轉左」
 
「知道」
 
打定左燈,慢慢cut入左線再等適當時機轉入去忠孝街。
 
條路都好似幾順咁喎。今次我係去到巴士站之後,先至再轉多次3波。原因係我怕日頭會有盲毛同巴士尾突出嚟,所以都唔係好敢太早轉3波。可能因為呢樣,考官又送多我一個「未能因應路況調整車速」啦。
 
無論如何,我上斜都係用3波嘅,直至過咗停車場,去到禁止泊車時牌度就落手拖返2波,左轉去返孝民街。
 
師傅話過,行細圈上山入孝民街,要睇住係中學個位度右線會有車衝上嚟爬頭,同埋左線好多時都有小巴落客,嗰時我就唔可以爬生車,一定要俾少少耐性等小巴落晒客先至行。
 
好在,今次無小巴阻住,可以好快行到去路口轉返入去忠義街。


 
到咗呢個時候,路試可以話已經完成。剩底就係要係忠義街度,考埋斜路開車、泊位、3手調頭。
 
 
架車00岩入忠義街上咗少少斜,考官就要求我做斜路開車。斜路開車經過咁多次反覆糾正同練習,已經無再chok、無標前、無溜後,順利咁起步完成。
 
考官又指示「請你繼續向前行,去泊4號位。」
 
「知道」死喇考泊S真係好驚但係又唔可以表現俾個官知道
 
 
將架車慢慢駛上前,去到目標白線前停車。
 
死嘞距離左邊架車太開而且呢個時候我竟然變咗白痴,完全忘記我可以無限時咁慢慢較正架車先至開始泊,結果就係係無意識之下就入後波開始泊位無得救
 
一路向後,一路諗起師傅教過,如果架車太開就唔好咁快扭軚,要等個泥擋過白線先扭晒佢。
 
可惜,我又太心急就扭軚,於是一路郁車又回番少少軚,希望可以修正少少,最少都可以泊到入去個格度。
 
點解都知唔work…正廢柴
 
見到個泥擋切唔正45度入白色格,都知道呢次泊位死硬。唯有頂硬上繼續泊埋佢先算。
 
做齊晒其他泊S位要做嘅事,可惜都係失敗收場……
 
泊完之後,考官較低隻窗話「個泥擋上咗壆喎。你要唔要落車睇?」
 
「?」我即刻心涼咗一大截,用百分之一秒冷靜落嚟之後,望一望左鏡,真係見到泥擋凌空上咗壆無聲出,答話「我己經睇到,唔駛落車,唔該阿SIR。」
 
衰晒,個乙部試無啦,肯定要重考

 
衰還衰,3手調頭都仲係要考嘅。呢個可以話係我比較有信心做得好嘅。
 
考官指示「請你將架車駛去前面黃線前面停底」
 
當架車去到黃線,考官又出聲指示「請你係呢度做窄路調頭」。
 
「知道」
 
考到最後一個項目嘞。
 
路頂度無工程車,好順利。
 
慢慢一路踩住極力子,一路踩住迫力咁慢慢慢車做3手調頭。
 
做第一手嗰陣,咦,架車好似仲係太快,即刻踩多少少極力子同迫力,再整慢d架車,溜去對面行車線嘅黃線前面停一停,再馬上大手扭向左邊,搞掂就踩停架車同落手制。
 
開始做第二手軚,首先由望鏡拎頭再拎頭開始,打左燈之後又再擰頭多幾次,確保考官見到我夠晒安全,先至入後波倒車。架車發出「咇咇」聲,慢慢向後,見到架車退到黃線,就要停車拉手制。當然啦,之前一定要係停車前開始扭定右軚喇。
 
老實講,第二手軚唔算做得太好,我諗只係及平日練習嘅7成左右,但呢個程度都已經令我夠時間扭右軚,為第三手軚做準備。
 
退好架車,就又要表演吓擰頭大法,打右燈,再擰頭然後入1波,做埋剩底嘅第三手軚。
 
都算順利,大手大手就扭完剩底向右嘅軚,仲回軚夠快,好快架車已經回直係左邊行車線。
 
考官指示「請你係過咗禁止停車牌後停車。」
 
「係。」
 
按指示係指定地方停車,熄匙拉手制,下意識咁望一望考官,見佢又望一望我,好似要提我入番後波咁。哈,呢樣嘢我記得0架!就算考官大人唔望我,我都知道係要入後波嘅。我唔會未搞掂就跳落車咁傻。
 
入完後波,考官就話「考試完畢。請你拎番駕駛考試牌入考試中心度等結果。」
 
「唔該阿Sir
 
呼,兩個月嘅時間準備同練習,全部都係為咗呢一刻。可惜,自己知道中期試已經肥咗,望就望路試過到關唔會全肥咁難睇。
 
落車見到師傅,同佢講咗幾句就入考試中心度。佢話會係路邊等我,叫我一陣拎咗成績就行行人路落去搵佢。
 
入到考試中心一陣,成績就出嚟。


 
估唔到,路試竟然pass咗!泊位調頭呢,泊位就衰接觸物體同泊車位置不正確,但三手調頭就一樣都無被剔!
 
黃紙度仲剔咗以下項目:
 
23. 未有查看交通情況 [輕微
呢個我真係唔多明,唔通我擰頭擰到頭都甩都仲唔夠?
 
31. 太接近其他物體 [ 輕微 ]
呢個我明,因為一開波落斜俾考官提「小心」同差d俾佢踩我迫力師傅其實都提過我好多次,架車成日飄埋一邊,好易俾人剔呢樣。另一個可能,就係爬死車同cut線嗰時,扭得唔夠開。
 
32. 未能在適當行車線上行駛 [ 輕微 ]
Err……可能係話我轉彎後入線唔靚,同埋架車成日左右飄掛?
 
36. 未能調整車速以適應交通情況 [ 輕微 ]
成條路都係死車同行人,點轉3波行快d呀?但係師傅又話過「3波都可以慢0架,你唔好俾咁大油咪得囉」
 
47. 警覺性及判斷力弱 [ 輕微 x 2 ]
Why?呢個唔明
 
48. 未能充份使用駕駛鏡 [ 輕微 ]
吓?咁都叫用唔夠鏡呀?即係想我點呢?我個頭又擰又轉又望鏡,好暈啦
(呢樣野係11月中同小巴uncle傾過,因為佢之前揸開貨櫃車,話每隔幾秒就要擰頭睇左右鏡。可能因為我無周不時都望左右鏡,太過專注望前面,所以俾考官剔呢樣野)
 
51. 手掣使用不當 [ 輕微 ]
唔通我又死蠢咁車未用迫力完全停定就落手掣?
 
53. 油門控制不當 [ 輕微 ]
唔通係話我應俾油時無俾油加速?
 
54. 離合器控制不當 [ 輕微 ]
我知,我知,控制極力子好差嘛……盡晒力啦再特訓啦唯有
 
55. 軚盤控制不當 [ 輕微 x 2 ]
我知轉彎唔夠好呀嘛,仲一定送埋個「轉彎位置不正確」俾我添……
 
59. 轉彎位置不正確 [ 輕微 ]
隨「55」附送我知,由孝民街轉入忠孝街做得唔好,呢樣師傅提過我。
 
總共12個細剔,無嚴重剔,就係咁樣pass咗丙部路試。路試呢部份都算係有交代,無浪費師傅過去兩個月嘅教導,亦都無搞出任何問題、安全咁揸返去考試中心。
 
拎住張黃紙由考試中心出嚟,個人有d失暈,原本應該行上行人路,但就行咗去車路度,仲阻住另一架考牌車落山考試,真係唔好意思。
 
走返上行人路,有個地盤哥哥問我考成點,唯有苦笑如實相告。佢就話「下次再嚟過囉。」
 
繼續行落去同師傅匯合,師傅叫我上車等一等佢。上車之前,見到另一個師傅,同一個大肚嘅女學神,似乎都係考忠義街嘅。師傅同嗰個師傅都話,好在我pass咗路試,因為路試向來有太多變數難合格,而家我pass咗路試,已經等於拎咗大半個車牌係手,只要下次考番泊位調頭,唔駛10分鐘就可以攞到牌。
 
上車之後,我就忙住影底黃紙嘅成績,whatsapp俾有關人士。學校嘅駐場阿姐係我神智唔清醒同我講再排期嘅事,我迷糊咁俾底510(好在有錢係身),交俾阿姐幫我排期再考。師傅安慰我,話我已經有大半個牌係手,而且考番泊忠義街,地面有d線俾我跟住較位,點都好過好似葵盛嗰d地面無晒線,靠自己睇住泊咁慘喎。
 
 
因為我個學牌已經交俾學校幫我排期,而家無車牌係身,加上非考試中嘅學神同學車唔可以日光日白出現係忠義街,所以今次都係要靠師傅揸車返太子警署。
 
師傅一路揸車離開何文田,每經過一個路口,就同師傅講我當時點揸同可能衰d乜。
 

 
去到太子警署正想落車,就收到電話,朋友阿BU話想幫我排快期再考泊位調頭。我拎住電話咁同師傅講,師傅又係度同我講無快期抽。 

講完電話之後,我就落車離開陪咗我兩個月嘅棍VAN同師傅。
 
 
一路等車返去,就一路拎住黃紙係度睇同講電話,諗番考試嘅情景同回想吓究竟衰d乜嘢,先至令考牌官剔咗我12個輕微。再睇黃紙後面張附頁,咦,乜原來乙部考試(泊車加3手調頭)真係有快期抽0架?等我即刻問吓師傅先。


 
師傅覆我,話雖然有得抽快期,但係如果抽4次都唔中,就自動排番正常隊,有可能反而比而家再排正常隊更慢喎。哦原來係咁,唔怪得啦。即使而家俾我抽得中快期,我都真係無信心泊好個S位。而家齋衰呢樣,第日補考一樣都係考番忠義街S位。好在醒醒定定pass咗路試,如果唔係要考過另一條考線仲死。
 
返到去,食完飯個心仲係覺得自己衰心急,未較好線就泊位,咁就死咗拎唔到牌好唔抵!
 
 
既然已經安排好補考嘅事,揸車呢樣嘢就暫時放底先。反正要係7個工作天之後先可以再申請補考,都唔知會排到幾時。相信而家到再補鐘學習、練習泊S位之前,都暫時唔會再揸車住。


相簿設定
標籤設定
相簿狀態