飛向天際

關於部落格
I Can Spread My Wings Out Wide, Touch the Sky
  • 16132

    累積人氣

  • 1

    今日人氣

    0

    訂閱人氣

2012-12-8 (六) 補鐘第一堂課

 2012-12-8 () 補鐘第一堂:泊位調頭斜路開車 @ 大圍
 
1500-1630
 
 
今日終於要再學車,不過跟嘅唔再係師傅,而係莫師傅。
 
第一次無師傅係身邊開車,要面對新嘅師傅同揸從未試過嘅新車,心情多多少少都會有d緊張,加上要練嘅係一向我都好怕兼做得唔係咁好嘅泊S位同斜路開車,更加係驚上加驚。(3手調頭反而唔係太怕喎)
 
只係希望駛得出師傅教過我嘅功夫,都唔敢奢望會做足百分百出嚟,第一堂嘅目標係只要唔好丟架已經足夠。
 


準時抵達集合地點,等莫師傅大駕到來上堂。心情出奇咁無之前預計咁大緊張,但係腦裏面就背熟番所有即將要練嘅動作嘅口訣,同埋諗番平時師傅會話我做得唔好嘅地方,又拎部手機出嚟睇吓影低咗英文書圖文教S位同3手調頭嘅圖片,用盡最後一秒鐘補底!
 
畢竟係910號考完試之後一直都無掂過車,雖然搭車嗰陣會不斷係腦度做模擬駕駛:cut線有做埋望鏡拎頭0架!起步要入一波、鬆極力子一段,放手掣同迫力再俾油!煞車要迫力拖慢車,再踩極力子先至踩迫力完全停車,再落手掣同空波!可能其他人以為我黐線,但我認為唯有咁做先至唔會完全忘記點揸車,有時搭車都好懷疑自己仲識唔識揸。
 
 
莫師傅終於都到,第一次見面,真係要請佢多多指教!今後一個月都要跟呢位師傅好好練習同補底。
 
 
「莫師傅!」
 
XXX!」又響全朵……
 
「我係!」
 
 
莫師傅同我上車後,講吓補堂堂數同日子,計埋學費。
 
「我想一個星期上一次,練多d
 
「吓?唔駛咁密
 
結果就決定係19(隔足10)28(又隔9)12號晚上忠義街補堂,之後就係13號考試。
 
 
莫師傅開車去一個距離只有5分鐘車程,中電變電站附近嘅斜路度上堂。係嗰度調位之後就開始埋牙!
 
呢架就係傳說中嘅新款車嘞!究竟要用幾耐先至摸熟架車嘅脾性呢?希望唔好太耐。新車嘅駕駛艙明顯比舊車窄同細,好似將所有嘢都夾硬質埋一堆咁,手掣、波棍嘅位置完全唔同,極力子、迫力、油門踩落去嘅足感都唔同晒,有d老鼠拉龜唔知點揸咁,只係夠膽按住莫師傅嘅指示慢慢行車,真係好驚架車一下子飊得太快出事
 
呢條路就係莫師傅口中同忠義街斜嘅路。同莫師傅唔熟,完全唔敢係車度放肆。
 
開車嘞。慢慢用一波碌上斜。咦?有架垃圾車阻住咗個斜路位,見唔到條白色貓線,於是莫師傅就落車係地面再噴一條線,等我可以有個參考咁練習。雖然架垃圾車阻住咗,唔可以複製到同忠義街考場一樣嘅環境,但起碼都要做熟番斜路泊車先。
 
 
架車真係好唔同,第一次做返斜路泊左S位同3手調頭,真係乜都唔記得,要莫師傅逐樣提水,真係丟晒師傅架無理由咁都會唔記得點做0架?只能夠話自己發車瘟。
 
真係唔明,點解只係無揸車3個月個腦就好似一片空白咁?明明記得師傅教過嘅嘢,但係偏偏用唔番出嚟嘅?
 
莫師傅架車個極力子好實而且磨擦點超唔明顯,好難吊得好,每次放極力子都升得太高,搞到架車震唔停;當我hold好個位,烏低身鬆手制,莫師傅又發現我會唔覺意放咗腳,令到極力子再升高、架車由唔震都變震。所以佢就叫我腳踭要頂住地板借力吊極力子,仲要我搵到令到架車震嗰個磨擦點之後,左腳就要定住,靠右腳踩迫力控制架車速度。一開始做得唔好,極力子高得滯又踩落d,低咗唔夠扭力又升番高d。就好似師傅之前話我,「咁樣踩極力子法好像車衣女工咁踩衣車,完全唔係用極力子控制架車」。真失敗。
 
另一方面,架車個迫力就超靈敏,輕輕力腳尖掂吓架車都會停,一個唔覺意鬆開就向後溜,又要勞煩莫師傅多次幫我煞停架車唔俾佢溜後(feel到好似係)…真瘀皮。
 
次次都係極力子累事。之前考路試又俾個官剔「極力子控制不當」,今次一定唔可以再係咁,如果控制得唔好,好易溜前溜後又輸!連莫師傅見到我個學牌都話「今次一定要合格,如果唔係又要做過學牌」。咪係囉,要加多幾公斤肉緊練習同熟習。
 
係斜路度不斷咁練,總共死咗4次火認真失禮學咗咁耐都仲可以搞到架車死火,瘀皮。就算係揸新車都唔係死火嘅藉口,我應該對極力子同架車嘅反應再敏感d
 
一次係斜路做大U-Turn上斜再練嗰陣,咁0岩個位前面有個井口位頂住,要再入後波就位先可以夠位上。莫師傅就話「嘿,咁樣就5手調頭,肥咗」,我答「咁點都好過撞到野」。之後佢俾咗兩張相我睇。相裏面架貨van考試時,撞爛咗條欄;另一張就係另一架學校嘅貨van,俾另一個學神撞花晒車身。呢兩張相就係用嚟告戒我要小心做調頭,既唔可以扭死軚,但又要及時回軚。
 
 
練到咁上下,莫師傅就指示落山試泊平路S位。呼,終於可以唞唞已經吊極力子吊到想斷嘅左腳。
 
斃在碌落山嗰陣個腦一片空白,都唔知好唔好轉波俾油去。莫師傅串番句「吓,你仲要望吓油門係邊度呀?」無言,唯有苦笑答句「話晒考完試之後都無揸過車」。其實佢都話得我啱。
 
去到平路度,咁0岩又有架車頂住咗佢位少少,僅僅夠位入。揸到埋去又有架貨車想泣嗰個位度。我同莫師傅都話「唔好掛,又頂住?!」好在嗰位貨車司機哥哥好人,見到架車咁大個「學」字,都知道係學神仔上堂,好心地俾番個位出嚟,等我可以練番幾次,先至再碌返上斜路練咋。見佢咁好人,架車揸到佢架車旁邊嗰陣,洒個冧俾佢先。
 
係平路泊S位都好似無乜問題。莫師傅提水,叫我泊最後一個動作入格仔嗰陣,望左鏡,只要確認架車同路壆平衡,架車已經入到黃格仔喎。直線障礙患者今日好成功咁泊到入去,而且扭軚都夠大手,無俾人話我扭軚揸牛奶。
 
練咗幾次平路吊極力子泊S位,再上番去斜路重覆斜路開車、泊S位、3手調頭直到夠鐘落堂。
 
 
揸完個半鐘,隻腳真係踩極力子踩到痛。
 
話咁快練埋考完試熄匙入波就落堂,係換位返大圍火車站之前,莫師傅話考試嗰日,佢會揸到斜路底,考官上車之後會先用斜路開車,叫我沿住黑線1波碌上去個位就ok(路程短,唔駛轉波上咁話),再係上面做埋泊S位同3手調頭喎。

莫師傅總結今堂,話我
3手調頭係第一手軚開始嗰陣chok,第二、三手都無乜大問題;泊S位又反而無乜comment喎;斜路開車就係極力子控制得唔穩。佢仲話,經過呢個半鐘,我開始掌握到架車嘅極力子同迫力個位。
 
我就覺得自己小腿真係唔係好夠力hold住極力子,睇睇可唔可以靠跳多d健身操,操練運用多d小腿肌肉先。
 
其實佢成堂都無乜點出聲,只係時不時見到我好似就出事先至出聲提點一吓。算係對我有信心?認為唔會點出大件事,所以唔出聲從旁觀察?
 

 
下次要到19號先上堂,記住吊極力子腳踭落地頂住,用迫力控制快慢、鬆極力子唔好一次放太高,如果太高就係咁易踩低少少等架車唔打冷震就好收手,千祈唔好又踩衣車。
 
 
返到屋企,同阿媽講今日上堂狂做泊車調頭斜路開車,吊極力子吊到腳都軟埋,點知佢就話「係咩,咁第日買車唔好買棍波嘞。」咳咳咳咩話?「吓?但係就算我買咗棍波車,總唔會每次開車都齋係吊住極力子做泊位調頭泊位調頭掛?」
 
係咪吹脹?
 
 

相簿設定
標籤設定
相簿狀態