關於部落格
I Can Spread My Wings Out Wide, Touch the Sky
  • 18453

    累積人氣

  • 0

    今日人氣

    1

    追蹤人氣

2012-12-28 (五) 補鐘第二堂課

一出火車梗係拿拿臨飊去搵師傅,唔好搞咁多嘢馬上上堂喇!
 
再見莫師傅,無第一堂嗰陣咁緊張。上到車,傾咗一陣有關19號無上堂補堂嘅事。
  
 
今日成條路都無乜其他車係度,但第一次見到大堆馬騮出沒。仲以為只有金山郊野公園一帶先有咁多馬騮,原來大圍都有。


 
 
無揸成3個星期,不出所料又有失憶症。一開車都要莫師傅幫我「boot機」,先至識得點做。失禮晒
 
 
廢話少講,開車先算。
 
今日真係唔係好專心,踩極力子仲係吊得樣衰,未有feel到磨擦點係邊。我唔想幫自己搵藉口,話耐無練呀,緊張呀咁,事實係做得唔好就唔好。
 
 
其實一路揸車,一路都feel到右腳腫咗,每次提高腳掌都覺得同對鞋有隻壓迫感,希望d腫只會出現短時間,唔會阻到我考試。反而左腳呢,按住莫師傅嘅教導,上到feel到摩擦點個位,就用腳踭頂住地板唔好郁,咁就無上一堂咁攰喎。
 
當我地係度練車嗰陣,有一班工程叔叔揸住貨van上嚟,仲係度餵馬騮!天呀!你咁餵法,唔怪得d馬騮會「進化」到襲擊遊人搶食物喇!


 仲要有兩個唔關事嘅大叔離遠望住,咁0岩架車停咗係度準備做3手調頭。如果我開車,驚揸得唔好飊得太快嚇到嗰兩個大叔,搞到我本來入咗一波踩住摩擦點都唔敢去。雖然莫師傅話,只要我一郁車,佢地會自動彈開啫,安全d好。於是又再手掣空波等一等,趁呢段空榴,拎部手機出嚟影到d馬騮搶食。
 
等咗分幾鐘都唔見嗰兩個大叔走開,我就示意要入後波,等架車轆後少少再做3手調頭。可能莫師傅係度無即時留意到我示意,而且以為我想就咁3手調頭,當我入後波開始轆落去嗰陣,佢想踩停我。我即刻同佢示意,我係想轆後d做,唔係入錯波0架。我知道自己做緊乜。
 
 
講開忠義街泊S位個試場,莫師傅話以前考斜路左S位,係要吊極力子將架車向後轆入個位度。以前考忠義街,係先係嗰度做完3手調頭,落去做S位,之後先至出去路試,而家就調番轉。
 
見莫師傅講起舊款考試程序,我問可唔可以試吓向上入S位,佢就趁做完3手調頭落緊山嗰陣俾次機會我試,反正嗰度都噴咗個位係度。
 
其實成個程序同而家一樣,只係要吊向後入位有d分別同真係易死火。試呢個位我死咗一次火,但繼續正正常常咁fing架車入位度,又ok喎。
 
莫師傅話「除咗天光道係L位之外,其他考場全部考S位」咁,我學咗車尾向上轆入S位,會唔會係香港無用武之地呢?「港島大把呢類位!」了解!又學多樣技術!多謝莫師傅俾機會我試呢款泊位!
 
莫師傅話到時佢會將架車泊係斜路底,到時報到完就行落去上車考。
 
記住要較好架車跟條線上去。等架車向後轆到貓線先至扭盡左軚。
 
 
今堂係泊位方面,我練習做落好似無咩問題咁,但事實上依然都要靠莫師傅不時出聲指示攞直架車同較好個距離。不過,起碼而家大概都就得到架車個距離要幾多。只係扭軚有時都唔覺意揸牛奶,未夠大手扭,呢樣嘢係做調頭時仲明顯影響大。
 
莫師傅教,盡量要趁架車條前軚全右嗰陣做好泊車,盡量唔會入咗位再攞直架車,如果唔係,泊完位扭出去就好易撞雪糕筒,臨尾香。

 
總結一下:今堂勁樣衰,竟然有兩次因為摩擦點放得太高,死咗兩次火仲有好多次放唔夠摩擦點溜後(即死!)…仲有一兩次因為架車去得太快差點撞,要莫師傅出腳相助

點會咁0話晒都已經第二堂,再係咁落去我都唔敢諗考試嗰陣會點
 
我而家寧願放多少少極力子,令架車個摩擦點明顯d,再就返踩低少少,就算死火唔會即輸;相反,放唔夠極力子就會溜後即刻被考牌官K.O.,又要再送錢俾錢俾運吉署仲有,煞車都係太大腳,搞到架車好chok。雖然車chok罪不至死,但如果考官坐得唔舒服,係marginal case情況下,可能會認為我控制不當,都未必會俾牌到時就大鑊。
 
今日莫師傅都唔乜點出聲係技術上話我,頂多出腳煞車。
 
仲會見多莫師傅兩次先至考試。
 
經過今日揸得咁屎,其實比之前仲驚
 


相簿設定
標籤設定
相簿狀態