飛向天際

關於部落格
I Can Spread My Wings Out Wide, Touch the Sky
  • 16435

    累積人氣

  • 0

    今日人氣

    0

    訂閱人氣

2013-1-1 (二) 補鐘第三堂課

未夠5點已經出到去太子警署,莫師傅比我更加早到,一早停咗架車係接近路口位,好在行前d望吓啫,如果唔係又遲到就唔好喇。
 
 
等到莫師傅上車,我問「俾唔俾我揸上忠義街呀?」 佢唔俾。又係嘅,我真係咁耐無揸過,有乜冬瓜豆腐就唔好喇,莫師傅有咁嘅顧慮完全合理。
 
話咁快莫師傅就3波、4波咁上到去忠義街。


 
因為今日係假期,所以地盤無開工,又無乜車係度,只係意想不到有咁多學車今日都一齊上嚟練習,唔通有好多人都好似我咁,2號、3號就要嚟挑戰呢個考場?


 
好耐無係日光日白上嚟呢度。到咗呢度,又不其然發車瘟,好驚、直線恐懼症、泊車較位恐懼症全部出齊,就算今日唔係好熱,係加埋緊張又怕做得唔好之下,背脊好快已經出晒汗
 
指定動作,就係不斷排隊做較線泊位,做完泊位扭出去向上轆做埋3手調頭,再轆落忠義街底做多次調頭再排隊,如是者玩足成堂。
 
 
當然,叫做「第一次」揸新車再上忠義街實戰,真係做得勁樣衰。放唔夠極力子溜後要莫師傅出腳、放得太高死火、較線唔準確搞到泊位大細邊或者掂壆,發生咗好多次,搞到莫師傅向我瞪白眼「唉」,又話「你咁樣點考呀?」自己做得咁差,都好唔開心,我都唔想無啦啦再做過學牌、再買路票、再補鐘0補考我都有壓力0……
 
排完一次隊,做咗兩次泊位同3手調頭之後,轆落忠義街底,哇,乜忽然有咁多學車排隊0架?既然要排咁耐,莫師傅批准同指示我做一樣恨咗好耐嘅事:自已開車行忠義街!
 
Yeah!!真係好耐無正式「揸車」喇!多謝呢咋突如其來嘅學車,我先至可以再揸番轉,重拾揸車嘅感覺!雖然只係揸細圈,我都好心足──畢竟都算係新車嘅新手,但有莫師傅係旁邊睇實,加上之前都行過咁多次,理論上唔會出太大亂子掛?
 
由於係第一次揸新車行忠義街考線,除咗做乙部d動作之外,唔熟架車係行車嘅表現,所以唔敢轉3波,一路都係做「二波小王子」,全程2波行晒。
 
好在仲記得3個幾月前師傅教行忠義街嘅要點,仲記得轆到孝民街口度要停車,踩住白色三角望吓兩邊有無車先至出。但莫師傅就指出,我停得太早,望唔到靠近自己一邊嘅行車線,要我再吊極力子開前少少;另外,又可以預先將車頭向左,準備見到無車,就可以即時扭軚走。係,呢兩點係我疏忽。行到斑馬線,都好習慣咁停車手掣空波,等d途人行晒先至再入波開車。
 
之後去到愛民商場,都仲記得周不時望吓有無巴士飊出嚟,同埋有無盲毛失驚無神彈出嚟過馬路。去到過咗停車場標誌就收油準備轉番上去。
 
點知就俾人話「你做乜踩迫力?」呆咗半秒至答「收慢入彎囉」「唔駛迫力,收油咪得囉!」「係係係」又做錯了
 
仲有一點做得唔夠好,莫師傅指出我「望唔夠鏡」,無乜點望到左右鏡睇吓會唔會有其他車竄上嚟。嗯,我同意,呢方面真係失策。
 
又再返到忠義街底排隊,慢慢吊極力子上去等做泊位。
 
今日呢堂最失敗嘅,係其中一次係忠義街底度做大U-Turn再排隊上嚟,好地地按莫師傅指示扭軚,都可以扭錯方向,俾人鬧「連扭軚都未識!」另一次就係就位就得唔0岩,差d撞埋人地架車度,要再做多次後退嘅動作修正(變咗5手軚...),先至可以扭番上去。
 
最最最最最差、最失敗嘅一次,又係發生係街底U-Turn嗰陣!做第二手軚向後嗰陣,hold個極力子hold得唔好,架車一下子後退得太快
 
bump」!
 
嗰時我先至醒一醒回魂停車。見到莫師傅塊面黑晒因為架車車尾撞到水碼……

莫師傅「你真係聽唔到咩?撞咗喇!」「哦…sorry…」「好在係水碼啫!」知道真相之後,我個人真係震,係驚到震,唔知自己控制架車都唔得點樣係3號考試又驚住撞爛架車,就好似之前見過嗰兩張相一樣,咁就死喇
 
…… 點都要「死」完呢堂再算

 
好艱辛先至「捱」完忠義街特訓,無論如何都係有收穫嘅。
 

莫師傅不斷耳提面命:
 
吊極力子:升到磨擦點時架車震,唔好踩迫力,俾架車去,咁就唔會死火。架車震得太嘈就踩番落少少。搵到磨擦點,就用腳踭頂住,唔好再郁佢,用迫力控制架車快慢。
 
要.慢.車
 
泊位時:1. 睇準d位扭軚、扭大手d,唔好扭軚幅度唔準確。2. 跟住條線去較直架車。3. 泊完扭出嚟印住迫力慢慢扭出嚟,一過雪糕筒就回軚。
 
調頭時:1. 俾架車去,唔好扭死軚。2. 咪咁大迫力,停車死軚就真係會死。
 
呢一堂終於令我真正咁feel到呢架車嘅磨擦點同埋架車震嘅反應,而且係泊位較線度,經過莫師傅不斷指點之下有d意識同感覺了。只係停車踩迫力都仲係太大腳,令到架車chok爆。每次停車chok、死火、有咩做錯,都會俾莫師傅用凌厲嘅眼神掃射就算唔俾人鬧,俾人咁「啤」住,我都識死嘅教嘅嘢、話嘅嘢會入腦。最驚係莫師傅覺得我教而不善
 
 
有次師傅問起我學車學成點,我唔敢講撞水碼、溜後呢d事, 唯有支吾以對,話「有莫師傅睇住,無問題」,我會「盡力考試」。師傅雖然話「唔俾壓力你」,但我都feel到佢期望我要pass…
 


相簿設定
標籤設定
相簿狀態