飛向天際

關於部落格
I Can Spread My Wings Out Wide, Touch the Sky
  • 16435

    累積人氣

  • 0

    今日人氣

    0

    訂閱人氣

2013-1-2 (三) 補鐘第四堂課

奇怪嘞!原來九龍塘A出口同又一城嗰邊嘅出口之間,係唔可以唔入閘係站內過嘅。即係話,如果要行去A2度上莫師傅車,一係就搵路係地面行,一係就被迫入閘嘥一程車錢,即係失去咗我原本想係九龍塘上車嘅意義。

 
WELL,無理由係站度等到夠鐘0架!點都會有路行到去嘅,所以都係出閘至算。買咗個魚生飯食,但一路食腳又開始勁癢,搞到我都無心機繼續食落去,食埋幾舊橙填肚就算。
 
今日我真係好緊張,經過尋晚又撞又溜之後,真係驚到想死!尋晚我係車度,忍唔住whatsapp俾莫師傅,同佢講聲對唔住,因為自己嘅表現實在太差勁,我真係完全無辦法接受到自己竟然會控制唔到架車,撞水碼呢件事,點講我都叫學咗咁耐車,仲路試合格,又揸咗呢部車幾堂。
 
 
為咗可以搵路出A2出口,唔可以hea太耐,要落又一城問吓d客戶服務部人員。果然同我睇地圖同諗嘅一樣,只要過橫跨火車站條天橋直行就可以去到嗰邊。太好喇!
 
行到出去,咦?仲未見到莫師傅架車嘅?打電話問吓先。
 
「喂,師傅,我到咗喇,你泊咗係邊呀?」「我嚟緊,你係邊度?」「er…真光里,近理想酒店囉」「你行錯喇,向窩打老道方向行喇,你會見到好多學車係度,嗰度先係A2喎」「哎呀好啦,我去搵吓路先,唔得先再call你」
 
好在有位食環署阿姐係度,又識得路,指番我去A2個方向。
 
果然,條路有好多學車聚集呢!九龍塘真係學車熱門地點!


 
係嗰度等咗一陣,見到一架好似係莫師傅架車轉入嚟,走上去見到真係佢。
 
 
 
今晚無再叫莫師傅俾我揸上去嘞,因為我都知道佢唔會俾。


 
 
又再返到熟悉又陌生嘅忠義街。今晚真係超~~~~~~多學車排隊!莫師傅話試過有一次排第20添呀!搞錯!咁玩法,真係個半鐘都未必泊到兩次喎!聽日點算呀?真係好無信心囉。
 
 
一路等,一路等,無咩嘢做,各自拎部手機出嚟玩。
 
等等吓,莫師傅又同兩個師傅傾一陣,禮貌上我都同兩位師傅打個招呼,兩位師傅都叫我「俾心機」。
 
嘿,真係禍不單行,停車chok俾班師傅見到都不特止,仲俾佢地見到我差d就撞埋去人地架貨車個側鏡,即刻俾人話「嘩你聽日考點算呀?」瘀死勁想拎隔離架挖泥車挖個窿走入去唯有以笑遮醜
 
 
泊位呢,較線都仲係好依賴莫師傅指示去做,唉連佢都開聲話「你聽日點算呀?」仲係不斷咁教我要幾時回軚,「條泥擋膠一掂到就扭啦,唔好等到成條掂到白線先至扭,咁就太遲」,「喂!回軚多咗15分鐘喇!」,「你睇,如果唔係左邊條膠短d,你一早已經掂咗壆!」,「唉,左轆掂咗壆喇」。佢仲教我「泊到見到左邊泥擋膠掂到黃色邊,架車同路壆平排就算。扭出去嗰陣,記住要印住迫力,慢慢出。一過咗雪糕筒就回軚,再慢慢轆上去做3手調頭」。知道喇!會記住!
 
好在3手調頭一直都係比較有信心嘅一項,練習起上嚟都無咁失禮咋!
 
做完3手調頭,講埋聽朝考完之後,當架車去到向住忠義街底,就熄匙同入後波。YES SIR
 
忠義街繼續係一條長長嘅學車車龍,所以做完一次之後,既然唔可以即刻U-Turn再排隊,莫師傅叫我再揸一次細圈。好嘢!又有得揸!
 
尋日做完「二波小王子」之後,今日試吓照返之前師傅咁教,轉吓3波先得。
 
出咗去忠民街嘅電單車位之後,腦裏面響起師傅把聲話「喂,2波咗好耐喇喎」,唔!係時候轉3波嘞!踩極力子!波棍由23波!
 
咦,一俾油架車有少少怪嘅,唔多似係3波會有嘅表現喎莫師傅又厲一厲我同波棍,我就覺得唔多對路,問「係咪入波入得唔好?」,但得到嘅答案係「呢個係5波,唔係3波」。之後莫師傅就幫我入番3波,哇好醜呀係新仔面前出醜呀
 
尋日表現差,莫師傅都幫我開脫,話「話晒都係第一次上忠義街,算係咁」。今日表現差,就真係無藉口好賴嘞。
 
落到去準備左轉入忠孝街,又俾莫師傅捉到錯處「你而家再考路試,哼,分分鐘肥得。你睇,踩黃線喇!」,仲話我「睇唔夠鏡」。係喎好在而家唔係考路試,聽日都唔係考路試咋。
 
順順利利,係莫師傅不斷開聲提示之下,係接近巴士站嗰度轉多次3波,去到停車場度拖返落2波再返入忠義街排隊。
 
臨尾莫師傅都再俾我做多一次先至走,係忠義街走嗰陣,都已經2230。佢經迦密村街出返去經天光道落返去。
 
今晚一共排咗3轉,做咗最少6次泊位同3次調頭,感覺都算唔錯,可以講即使對聽朝嘅考試仲係擔心,但最少已經有番d信心。
 
 
去到太平道,約埋聽朝8點鐘係太子警署等,即係唔夠10粒鐘之後又再見到莫師傅喇!
 
無論點都好,聽朝見!


 
相簿設定
標籤設定
相簿狀態