關於部落格
I Can Spread My Wings Out Wide, Touch the Sky
  • 19126

    累積人氣

  • 3

    今日人氣

    1

    追蹤人氣

2013-1-3 (四) 再戰忠義街 @ 忠義街考試中心

未夠6點,個人已經醒咗。
 
起身食少少嘢,即刻要梳洗準備出門口,要8點鐘出到去太子警署同莫師傅會合。希望仲會有少少時間偷吓雞練多一兩次,壯一壯膽先應考。
 
  
去到警署無耐,見到一架同校嘅棍VAN接咗個女學神走,我估都係9點左右考試,唔知會唔會都係忠義街呢?
 
等多一陣,見到莫師傅揸住架車到。
 
好驚好緊張今日我嘅頭幾句對白就係呢幾句
 

 
話咁快又上到忠義街,係路程度我都無講過太多嘢,莫師傅都一樣。但我好留意佢點踩極力子,好想盡最後一秒偷師,點樣可以揸得咁順。
 
去到忠義街,再見到尋晚一齊吹水嗰班師傅,睇嚟佢地班學生都係考9點幾喎。見到仲未有車霸住考試位,莫師傅就即刻同我調位,等我可以偷雞練多兩次先至報到。
 

 
呢個時候係路頂度有兩架泥頭車係度唔知裝卸d乜,好鬼嘈。因為我經常搵磨擦點唔準,莫師傅特登叫我「一陣咁嘈,你磨擦點搵得準d,架車震先好鬆手掣」。仲閂埋車窗,等我可以聽到架車到磨擦點嘅聲音同反應好d,盡最後一秒補底。
 
今朝先練2號位,入得差少少,要入咗格之後再整直架車,結果扭出去之前,要再扭盡右軚先避得開雪糕筒同支竹,呢個係一個教訓,亦都教識咗我如果一陣、萬一發生同類情況應該點應付。
 
3手調頭就無得練嘞今次。練完2號位,莫師傅就指示我泊係考試4號位對落個車位度,準備一陣考泊4號位。記住,扭出去一個圈左右個位已經差不多可以令架車同旁邊距離一呎半左右,同淺色黑線成一直線,個位就ok
 
泊好車就落車行行企企,等時間到就入去報到
 
練咗嗰一陣,個人緊張,成個背脊都濕晒。

 
去完廁所返嚟,莫師傅就指我入考試中心報到,時間大約係0840
 
又係提早推我去送死。點解鑊鑊都咁早推我去受靶?超驚!
 
 
考試中心出面已經有3架學車準備應考,入面亦都有3個學神報到。我之前仲有一個男學神,但佢考0905,所以我先報到。
 
考試中心嗰位試場主任,依然都係9月應考時嗰位,報到完之後就拎咗對「駕駛考試」鐵牌出去交俾莫師傅掛起,跟住就俾佢叫我上番車撻車,坐係入面等等等我一條友係架車上面,都唔知點樣咁,緊張到真係差d喊出嚟,可能真係背負住咁多人嘅期望同祝福,都係一種壓力。
 
我真係好驚,知唔知我有幾緊張吖
 
莫師傅唔止一次講,考乙部要補8堂係「好少人咁做」,講到我補咁多堂好似好誇張咁。但係,自己知自己事,寧願有多d時間學習、適應,可以一次過合格,點都好過補得太少堂,結果又要送錢俾運吉署。
 
陸續見到考牌官係考試中心間屋仔走出嚟,開始上去d考合併試或者齋丙部嘅考車上面。又見另一個考官走咗去我後面一架學車上面,睇嚟泊係後面嗰位都係考乙部喎。
 
後面嗰位學神,似乎係考泊4號位,開車去到我前面開始後退做泊左S位。我一邊緊張,一邊揸住軚盤,一邊睇住嗰位學神嘅動作,再睇埋佢3手調頭,真係做得靚!合格硬喇!
 
珠玉在前,騰雞學神好緊張。莫師傅突然走番埋嚟,打開車門講「要有心理準備扭出去之後,個考官會叫你停低,做一做斜路開車。乙部考4樣嘢0架嘛:斜路停車開車、泊位、調頭」。呢頭走開,嗰頭又番嚟再提醒我「一陣會做視力測試」。
 
一條友係架車度,繼續係度齋等,乜都做唔到。見到前面個學神考完,個考官走返入去考試中心,再睇吓車入面個鐘,0855,究竟考官幾時會到呢?
 
無幾耐之後,負責之前個學神嗰位考官走番出嚟,而且行緊埋嚟我部車度。嗯,應該係呢個考官。
 
2012910號考合併試丙部合格,乙部唔合格,到12月開始補鐘上堂,一路拖到201313號再考,都係時候了結呢件事!
 
 
望到考官走緊埋嚟
 
考官上車嘞。
 
「早晨!」
「阿sir 早晨」我故作鎮定。
「你係咪考生XXX?」
「我係。」
 
趁個官係度整緊d文件,再做多次check櫈、鏡、波、安全帶嘅動作先。
 
「好,而家請你讀係前面泊咗係度嘅私家車車牌俾我聽。」
 
吓?哦個腦突然間一片空白,完全忘記咗乙部試都有視力測試呢一關。
 
XX 0000
 
「好。而家我地開始考試。我地先做泊位,當你準備好就扭出去。」
 
「知道」
 
打右燈、望鏡、拎頭,踩極力子入一波,升極力子搵磨擦點記住等到架車震,就定住隻左腳唔好俾佢繼續彈高,先至好放手掣,慢慢扭出去
 
記.住.慢.車!
 
考試唔限時,千祈唔好又再衰心急!
 
慢.慢.做!
 
再拎頭望多一次外面就扭軚出去。今次好明顯feel到磨擦點係邊度!到咗位之後,架車開始震,但無嘈到拆天咁,定住左腳,放手掣,無溜後,好成功出車!
 
點解係都要到考試先至真正同架車熟?早d習慣佢唔得0架咩?可能只係我自己感覺遲鈍,唔關架車事。
 
扭呀扭,大手扭軚一個圈左右,個車頭同半個車身已經伸咗出泊位之外,突然間架車停咗!但唔係死火!
 
係因為考官出腳踩咗迫力
 
當堂個人呆一呆!
 
跟住個官出聲「你睇後面有車上緊嚟」
 
Fuck!又望唔夠鏡真係自己疏忽,睇唔到有車衝上嚟!
 
唔係就咁係莫師傅同一班師傅面前就因為「考牌官採取行動」,考試未考到入肉已經死咗吖嘛?
 
架車停咗之後,自己踩番迫力手掣空波,再望一望鏡拎頭,就繼續做埋落去。
 
除咗覺得有可能又要重考,同埋瘀到想搵窿捐之外,心情無乜大受影響。可能因為已經緊張到麻木咗
 
考牌官出聲同踩停架車之後,我真係粒聲都無出過,當無一回事咁,即刻自己再落迫力,落手掣、空波,之後再重複一次打燈望鏡拎頭,再踩極力子入一波,搵摩擦點再鬆手掣,出車前再望多次鏡,拎多次頭,先至扭出去。今次真係無車嘞
 
咦,唔係俾咗30蚊場務咩?佢地無幫我截車嘅……?呢30蚊真係俾得唔抵!
 
咁樣算唔算順手考埋斜路開車呢?
 
理得佢咁多吖,而家直頭將莫師傅拋諸腦後,完全無視佢就企係架車旁邊嘅事實,心裏面只係專注咁諗一定要較好架車,跟住條淺黑色線行,再泊埋個位。坐係旁邊個考牌官,我直頭當咗佢係一團著住綠色衫褲、戴太陽眼睛嘅空氣,無視咗佢嘅存在,自己做自己嘢。
 
出車之後,記住莫師傅教導,扭大約一個圈嘅軚,再慢慢回,望吓左鏡睇睇架車係咪貼住條淺黑色線轆緊上去。唔,今次算係較得幾準,雖然未係做到莫師傅係車度直接教授咁,成架車踩住黑線上咁perfect,但呢個moment架車已經踩住三分一條黑線上。既然係咁,無謂再亂咁搏較位,費事架車上到忠義街頂做3手調頭個位,都未較好兼S形行車,咪仲死!
 
既來之,則安之,唯有係扭軚嗰度做好d補番數,只要車尾入咗黃格,左邊車轆同泥擋膠唔好掂壆就「算數!咪再扭!」
 
係左鏡見到白色貓線之後,停咗車拉手掣空波,先嚟第一round望鏡拎頭,先至入後波再望鏡拎頭,「落斜駛乜搵摩擦點?直接放手掣用迫力控制架車轆落去!」。
 

 
好順利,真係做到慢車轆落去。因為距離條黑線闊咗,所以當架車踩住白色貓線後少少,先至大手扭向左邊,架車就真係好似莫師傅咁講,係車位右上角對落大約10吋左右切入去。
 
每次練習泊位做得唔好,包括扭軚唔夠大手、唔夠快,扭軚時間拿捏得唔準,令到架車泊得唔靚,莫師傅經常都「提醒」:唔係右邊前面藍燈、後面黑色泥擋膠同車位條線重疊先至扭軚,係藍燈同泥擋膠隻角一掂車位線就要扭呀!!!
 
上咗4堂,臨尾嗰兩堂聽佢講呢段對白聽咗好多次,亦都因為犯同一錯誤好多次,所以係考試呢個時候個腦度都不其然彈番呢段對白出嚟,點醒番自己唔好發夢,要準確咁扭軚。
 
仲記起師傅教過,如果架車同個泊位距離太開,就要等架車過咗白色貓線先至扭軚入個位度。
 
 
架車好順利咁慢慢入到泊位,跟住就要用完即棄左鏡,望住右鏡,見到藍色燈線掂到車位白線,即刻停車,望實堂軚向右扭兩個圈,再郁車直到後面條黑色泥擋膠掂到白線,即刻又大手扭埋向右邊,等架車慢慢入晒格之後,又要用完即棄右鏡,改望中鏡同左鏡,見到架車同路壆都尚算平衡,由中鏡見到車尾踩入黃格,遮住咗「LGV3字英文字嘅一半,左鏡度又見到已經切短咗嘅泥擋膠平衡。OK!算數!停手,迫力極力子再迫力,手掣空波!泊完!
 
都唔知係邊度嚟嘅勇氣,覺得自己已經泊得OK,就同考牌官講「我泊完喇,Sir。」考牌官無出聲,又無伸個頭出去望,就同我講「你可以扭番出去嘞」。
 
~~~講得呢句即係表示收貨?!收貨即係合格?係咪咁解?
 
跟住落嚟就係要小心扭出去,唔好掂到雪糕筒。
 
上堂時莫師傅不斷提我:泊完位出車時搵到摩擦點都要印住少少迫力出去,架車要有咁慢得咁慢,但出咗雪糕筒之後,就要大手回軚,等架車返番埋行車線度,然後轆上忠義街頂做3手調頭。
 
知道!我仲記得你嘅教導!所以係完全按住上面講嘅步驟,一步一步咁印迫力扭出去,再扭番入嚟。嘿,估唔到又好似OK喎,黐返去左邊行車線,貼住黃線大約1呎半咁上下轆上去。
 
「請你將架車駛到去前面,壓住路面條白線」
 
「係!」
 
今次反而好順利咁做一次斜路停車,無上堂嗰陣做得咁chok,算唔算pass到斜路開車停車呢咁樣?
 
「可以開始做窄路調頭」
 
「知道」
 
加油呀!最後一項!亦都係我一向最有信心做得好嘅一項!
 
打燈望鏡拎頭,今次真係睇清睇楚前後左右都無車殺上嚟,先至敢入一波同開始鬆極力子。呀,架車震嘞,踩底番少少先,feel到架車想向前行,再望多次盲點,定住腳就放手掣出車。
 
慢車!慢車!慢車!記住做3手調頭一定要夠慢,但一定俾架車去,唔可以扭死軚
 
架車好慢
 
0岩晒!就係要咁!
 
架車開始郁,即刻大手扭向右邊。咦,架車好似快咗少少喎,唔緊要,踩低極力子多少少先。唔,而家個速度非常好。一路溜向水碼面前,睇到前面左鏡度開始踩到雙黃線,就即刻回転扭向左邊。當架車超慢咁係我扭緊向左溜前嗰幾秒鐘,已經去到第二條車頭貓線度,係時間停晒車,完成第一手軚。
 
雖然自己對3手調頭好有信心,但一d都唔可以鬆懈。
 
輪到第二手軚。
 
照樣都係望盲點,睇吓有無人係後面何文田體育館外面條行人路走嚟走去阻住,先至打左燈,再望鏡拎頭望埋中鏡睇清楚唔會有盲毛彈出嚟,然後入後波,再望鏡拎頭,驚死個考牌官唔會個頭拎咗去邊,睇唔到我做足安全措施先至開車。
 
嗯,倒車嘞。
 
終於可以駕馭到呢架新車喇!個磨擦點好明顯!倒車一路都好順利,一邊慢溜向後,一邊快手扭埋剩低唔係好多嘅左軚,直到係右鏡見到藍燈去到石壆底就開始再踩低少少極力子,再整慢d架車俾自己有多d時間可以係第二條黑色貓線到石壆底停車前,可以大手扭多d右軚,咁樣一樣轉出去就算有水碼,加埋擺晒出水碼外嘅雪糕筒都唔駛驚,一定夠位出車。
 
車慢軚快真係不變嘅定理。係第二條貓線掂到石壆底之前,我感覺到已經扭咗大約三分二嘅右軚,比起平日練習時扭得仲大手。理論上無問題。
 
做完第二手軚,梗係想嗱嗱聲做埋第三手收工大吉,只係向右邊一望,竟然見到另一架棗紅色嘅貨van,係距離我大約2架車位之下嘅位置做緊3手調頭。呢個時間係得忠義街出現,十居其九都係考緊牌0架喇?!
 
哎呀,千祈唔好亂搏,費事又再俾考牌官採取行動,一腳伸埋個迫力度,咁就玩完可以再送錢俾運吉署,幾大都唔好亂郁,實行敵不動我不動。
 
但係不動之際,都總要做番d嘢,等個官知道我係識做3手調頭,唔係係度齋拖時間嘅。好,又嚟打燈望鏡拎頭,入波鬆極力子,再望鏡拎頭,但唔放手掣出車住,等埋樓下架車做完先至出車。
 
個官可能見我係咁睥實嗰架棗紅色嘅貨van,睇得出我係想等對方做完先至出手,考牌官就出聲「你可以做埋最後一手軚」
 
「知道」
 
幾大都係你叫我做先至做喇!費事一陣出咗車又話我唔睇交通情況,一嘢就K.O.我。
 
既然個官都叫我做,嗰架貨van又幾乎完成第二手軚,咁就鬆手掣出車喇!
 
輕輕鬆鬆咁扭埋剩底嗰少少右軚,架車好順利,仲有幾多位剩咁就去咗左邊行車線嘞。
 
「請你停車」
 
「係」
 
嗯,你唔駛望我,我記得要做d乜:
 
停車手掣空波,跟手熄匙再踩返極力子入後波。
 
「考試完畢。可以拎返對『駕駛考試』牌去考試中心」
 
「唔該阿sir
 
終於完咗呢個乙部試但係佢會唔會因為一開波就整停我,搞到我唔合格呢?好擔心
 
 
莫師傅見到我熄匙就走過嚟收拾殘局,佢第一句係話見到我00岩開車考試時嘅事:「點解有車都照樣扭出去?」
 
「我真係睇唔到有車。最少我出車之前望鏡拎頭真係睇唔到有車衝上嚟喎。但係個官係我一出車嗰陣已經踩迫力整停咗我」我越講越鵪鶉,越講越細聲
 
莫師傅扔番對「駕駛考試」牌俾我,等我拎返入考試中心等受靶。
 
今次肥嘅話,真係無晒面返去見人,我諗我真係會當場崩潰。
 
垂頭喪氣咁走上去考試中心,企係入面等成績。當時只有我一個學神,似乎其他合併試同丙部試嘅考生未返,其他乙部考生就考完拎埋成績走人。
 
無幾耐考試中心主任叫名,叫我拎成績。
 
「同學,你合格呀!恭喜你!」
 
呢一刻,完全用破涕為笑嚟形容都完全唔過份,真係由心度笑出嚟:咁都合格喎!俾官踩停架車都合格喎!跟住就成個人攤軟,坐咗係張橩度傻笑,同埋向主任講「多謝晒!其實我考嗰陣真係好驚0架!好在終於合格!」
 
終於唔駛再返忠義街練車喇!!YEAH~~~~~~!!!
 
唔駛續學牌、買路票,可以升呢做P牌仔喇!YEAH~~~~~~!!!
 
心情即時大好,笑住咁拎住黃紙同學牌走出去。即刻覺得如釋重負,天氣都變好咗咁。


 
走落去搵番莫師傅報喜,其他師傅都在場,一齊戥我合格高興!

 
如果當初可以係師傅手上一take pass就唔駛再俾考車壓力折騰多幾個月。不過,話分兩頭,如果合格咗,根本唔會識到莫師傅,亦都唔會有機會得到佢嘅指導。
 
好多謝莫師傅點醒我。

 
行到返太子道西,好熟悉嘅道路。

 
 
最後都返到嚟太子警署──開始學車、考車失敗、再學車、終於奪P凱旋返來嘅地方──學車開始同結束都係呢一道。但我知道,考到P牌只係一個開始,前面仲要有好多嘢需要學習。

 
落車,同莫師傅影番兩張合格相。
 
影完相,多謝莫師傅之後就同佢道別。
 
目送莫師傅接咗另一個學生離開,我仲有d依依不捨呢個學車集中地。過去半年,係呢度由騰雞學神變成而家嘅P仔,諗返起好似只係發生咗無幾耐咁,企番係度,睇住其他學神、師傅嚟嚟去去,就好似當初企係度,好緊張咁等上第一堂嘅時候一樣。百般滋味。
 
7個工作天之後就可以申請暫准牌,即係P牌,正式展開P仔生涯。預祝我安全渡過掛P牌期,一年之後如期甩P
 
 

相簿設定
標籤設定
相簿狀態